देहूरोड परिसरात गणेश जन्मोत्सव उत्साहात : भजन, प्रवचन व महाप्रसादाचे आयोजन ; चिंचोलीत गणेश अथर्वशिर्ष विषयावर प्रवचन , अथर्वशिर्ष पठण , भजन , आरती, महाप्रसादाला भाविकांची गर्दी
देहूरोड : गणेश जयंतीनिमित्त गुरुवारी पहाटेपासून रात्री उशिरापर्यंत देहूरोड परिसरातील विविध गणेश मंदिरांत काकडारती, धार्मिक कार्यक्रम, महाआरती , भजन व कीर्तन व महाप्रसादाचे आयोजन करण्यात आले होते. मंदिर आकर्षक रांगोळी, मंदिरांच्या गाभाऱ्यात केलेली फुलांची मनमोहक सजावट व आकर्षक विद्युत रोषणाईने भाविकांचे लक्ष वेधले जात होते. चिंचोली येथे गणेश मूर्ती प्राणप्रतिष्ठापना द्वितीय वर्धापन दिन व गणेश जन्मोत्सवानिमित्त ३ दिवस गणेश अथर्वशिर्ष विषयावरील प्रवचनांसह विविध धार्मिक कार्यक्रमांचे आयोजन करण्यात आले होते . गणेश मंदिरांमध्ये दर्शनासाठी व प्रसादासाठी भाविकांनी गर्दी केली होती.
देहूरोड पंचक्रोशीतील शेलारवाडी , साईनगर , मामुर्डी – शितळानगर , किन्हई , झेंडेमळा व चिंचोलीत गणेश जयंतीनिमित्त गुरुवारी (दि. २२ जानेवारी ) पहाटेपासून दिवसभर विविध धार्मिक कार्यक्रमांचे आयोजन करण्यात आले होते .
देहूरोड येथील सुदर्शन मंडळ वैश्य समाज मंदिर येथे सायंकाळी ४ ते ७ . ३० दरम्यान गणेश याग संपन्न झाला . महायज्ञात ५१ जोड्या सहभागी सहभागी झाल्या होत्या . पौराहित्य ११ ब्रम्ह वृंदांनी केले . सायंकाळी ७ वाजता श्रींची महाआरती संपन्न झाली असून रात्री ८ ते ११ दरम्यान महाप्रसाद (भंडारा) वाटप करण्यात आला . बाजारपेठेतील महात्मा फुले अखिल मंडई मंडळाच्या वतीने गणेश मंदिरात विविध कार्यक्रम आयोजित केले होते.
देहूरोड येथील त्रिशुल मित्र मंडळाच्या श्री विघ्नहर्ता गणेश मंदिर सातवा वर्धापन दिन व गणेश जयंती निमित्त सकाळी सव्वासात ते पावणेआठ दरम्यान श्रींचा अभिषेक, पूजा , आठ वाजता पुण्याह वाचन , साडेआठला नवग्रह आवाहन, पूजन ,मुख्य देवता पूजन , त्यानंतर होम हवन आदि धार्मिक कार्यक्रम संपन्न झाले. हभप प्रमोदमहाराज पवार यांचे प्रवचन झाले . दुपारी सव्वाबारा वाजता श्री गणेश जन्म , पाळणा व आरती झाल्यानंतर महाप्रसाद वाटप करण्यात आला . श्री गुरुदत्त महिला भजनी मंडळ, ॐ नमो शिवाय महिला भजनी मंडळ, सद्गुरू भजनी मंडळ यांची भजने झाली . सायंकाळी सातला उपस्थित मान्यवरांच्या हस्ते महाआरती झाली . ट्रस्टचे संस्थापक धनंजय मोरे, मंडळाचे सर्व पदाधिकारी व सभासदांनी संयोजन केले.
चिंचोलीत ३ दिवसीय प्रवचनमाला संपन्न :
चिंचोली येथे गणेश मूर्ती प्राणप्रतिष्ठापना द्वितीय वर्धापन दिन व गणेश जन्मोत्सवानिमित्त ३ दिवस ह.भ.प.श्रीकांत महाराज पातकर यांनी गणेश अथर्वशिर्ष विषयावर प्रवचन केले . श्रीगुरुदेवदत्त भजनी मंडळ , ज्ञानेश्वरी महिला भजनी मंडळ , भैरवनाथ भजनी मंडळ व साईगणेश भजनी मंडळाची भजने झाली . कामगार नेते तुकाराम जाधव व उमेश भेगडे यांच्या हस्ते आरती झाली . तीन दिवस विविध धार्मिक कार्यक्रमांचे आयोजन करण्यात आले होते . गणेश मंदिरांमध्ये दर्शनासाठी व महाप्रसादासाठी भाविकांनी गर्दी केली होती. चिंचोली ग्रामस्थ व जेष्ठ नागरिक संघाने सहकार्य केले . साईनाथ मित्र मंडळाच्या सर्व सभासदांनी संयोजन केले .
✍🏻संपादक – देवराम भेगडे
