देहूरोड , किवळे , मामुर्डी -रावेत परिसरात बैलपोळा उत्साहात साजरा

1. देहूरोड , किवळे , मामुर्डी -रावेत परिसरात बैलपोळा उत्साहात साजरा: भंडाराची मुक्त उधळण करीत बैलांची गावातून वाजत गाजत मिरवणूक

देहूरोड  : देहूरोड कॅन्टोन्मेंट भागातील किन्हई ,चिंचोलीसह ,  किवळे, विकासनगर व रावेत  परिसरात नागरीकरणामुळे शेतीचे प्रमाण झपाट्याने घटत असतानाही   भादवी बैलपोळा सण मोठ्या उत्साहात साजरा करण्यात आला. काही शेतकर्यांनी  सजविलेल्या बैलांची गावांतून  मिरवणूक काढली होती. फटाक्यांची मोठ्या प्रमाणात आतषबाजी करण्यात आली. मिरवणुकीत काही शेतकरी  सर्जा -राजापुढे  बेधुंद होवून नाचत होते.

शेतात वर्षभर राबणाऱ्या बैलांच्या  ऋणातून  उतराई होण्यासाठी भाद्रपद अमावस्येला परिसरातील शेतकरी बैलपोळा सण दरवर्षी उत्साहात साजरा करतात. बुधवारी  सकाळपासून बैलपोळ्यामुळे बैलांना  नदीवर आंघोळ घालण्यासाठी गर्दी केली होती. काही शेतकऱ्यांनी मात्र मुबलक पाणी उपलब्ध असल्याने बैलांना घरीच आंघोळ घातली. शेतकर्यांनी दुपारनंतर  घरातील  बैलांना  सजविण्यास सुरुवात केली होती. बैलांच्या  अंगावर विविध ठिकाणी रंग लावले होते. बैलांच्या अंगावर घरातील लहान मुला -मुलांची नावे रंगाने लिहिली होती. बैलांचे खांदे शेतकर्यांनी तेल लावून मळून घेतले होते. काव व हळद लावली होती. तासून घेतलेल्या शिंगांवर  हिंगुळ व बेगड लावले होते. काही बैलांच्या शिंगांवर टोकदार शेंब्या  लावल्या होत्या.  त्यावर चौरी व गोंडे लावले होते. बैलांच्या गळ्यात घुंगरमाळा घातल्या होत्या. नाकात नवी वेसन व म्होरकी घातली होती. काही बैलांच्या  डोक्यावर रंगीबेरंगी आकर्षक  अशी बाशिंगे  बांधली  होती. गावच्या वेशीतून  मानाची   बैलजोडी वाजत-गाजत गेल्यानंतर गावातील इतर शेतकऱ्यांनी बैल नेण्यात आले. सुरुवातीला काही बैलांना नारळ बांधून मोकळे सोडण्यात आले होते. किवळे विकासनगर भागात काही  शेतकऱयांनी बैलांची ढोल ताशाच्या गजरात    मिरवणूक काढण्यात आली होती . बैलांना  गावातून मिरवून घरी आणल्यावर घरातील सुवासिनींनी बैलांना  ओवाळून पूजा केली व पुरणपोळीचा नैवद्य दिला.

शेतीक्षेत्र घटले ; बैलांचे प्रमाणही घटले 

    चिंचोली , किन्हई , झेंडेमळा , काळोखेमळा, हगवणेमळा व शेलारवाडी  भागातील शेती लष्कराने संपादित केली असली तरी उर्वरित शेतीच्या मशागतीसाठी काही मोजक्या शेतकऱ्यांनी बैलजोड्या सांभाळल्या आहेत. रेडझोनमुळे बैलांची संख्या घटली आहे. मात्र  बैलपोळा सण शनिवारी तेवढ्याच उत्साहात साजरा केला.  सुवासिनींनी  पुरणपोळीचा नैवद्य खाऊ घातला.