चिंचोलीतील जेष्ठ नागरिक संघाकडून पालखी मार्ग निकृष्ट दर्जाच्या दुरुस्तीच्या निषेधार्थ खड्ड्यांचे पूजन करून वेधले प्रशासनाचे लक्ष
देहूरोड : कॅन्टोन्मेंट बोर्डाने कॅन्टोन्मेंट हद्दीतील देहूरोड येथील वीरस्थळ ते सीओडी डेपो दरम्यानचा संत तुकाराम महाराज पालखी मार्गावरील खड्डे दुरुस्तीसाठी ७-८ महिन्यांपूर्वी सुमारे २४ लाख रुपये खर्च केले आहेत . मात्र खड्डे दुरुस्तीचे काम निकृष्ट दर्जाचे झाल्याच्या निषेधार्थ प्रशासनाचे लक्ष वेधण्यासाठी चिंचोलीतील जेष्ठ नागरिक संघाने देहूरोड ते सीओडी डेपो दरम्यानच्या रस्त्यावरील विविध खड्ड्यांचे पूजन करून पुष्पहार अर्पण केले .
पालखी मार्गावरील देहू- झेंडेमळ्याजवळ असलेल्या सीओडी डेपो ते देहूरोड येथील महामार्ग चौक दरम्यानचा रस्त्यावर संत तुकाराम पार्क, लोहमार्गाजवळ , एमई लाईन , शनि मंदिर , गणेश सोसायटी , चिंचोली , अशोकनगर व लष्करी भागात संत तुकाराम महाराज प्रवेशद्वारापर्यंत विविध ठिकाणी धोकादायक लहान -मोठे खोल खड्डे व आडवे चर असल्याने रस्त्याची दुरवस्था झाली आहे .
चिंचोली ते देहूरोड रस्त्याच्या संरक्षक बाजूपट्ट्यांची दुरवस्था झाल्याने विविध रस्त्यालगत पाणी साचत असून काही ठिकाणी रस्ता व बाजूपट्ट्या यांत अंतर वाढल्याने चालताना अडथळा होत आहे. अनेकदा दुचाकी व मोटारींसह इतर वाहनांचे अपघात होत आहेत . पालखीमार्गावर कॅन्टोनमेंट बोर्डाच्या हद्दीत सीओडी ते देहूरोड महामार्ग दरम्यानच्या रस्त्यावर २५ गतिरोधक असून आयआरसी निकषानुसार बनविण्यात आलेले नाहीत . अनेक गतिरोधकांवर पांढरे पट्टे नाहीत तर काहींचे अस्पष्ट झाले आहेत . परिणामी अपघात वाढले असून जेष्ठ नागरिकांच्या आरोग्याचा प्रश्न निर्माण होत आहे .वाहन चालकांना पाठीचे व मणक्याचे आजार वाढू लागले आहेत . चुकीच्या गतिरोधकांमुळे वाहतुक कोंडीत भर पडत आहे .
देहूरोड कॅन्टोन्मेंटने पालखी मार्गावरील खड्डे दुरुस्तीसाठी सुमारे २५ रुपये खर्च केले असून दुरुस्तीच काम निकृष्ट दर्जाचे काम झालेले असल्यामुळे पुन्हा धोकादायक खड्डे पडले असून हा पालखी मार्ग वाहतुकीसाठी धोकादायक बनला आहे . अपघातांचे प्रमाण वाढले आहे . वाहतुक कोंडीत भर पडली असून खड्डे चुकविताना वाहन चालकांत अनेकदा वाद होत आहेत . वाहन चालकांना जीव धोक्यात घालून प्रवास करावा लागत आहे . रस्त्याच्या निकृष्ट कामाची चौकशी करून संबंधितावर कारवाई करणेबाबत कॅन्टोन्मेंट बोर्डाचे मुख्य कार्यकारी अधिकारी तसेच बोर्ड अध्यक्षांना पत्र देऊनही कार्यवाही झाली नाही , परिणामी प्रशासनाचे लक्ष वेधण्यासाठी चिंचोलीतील जेष्ठ नागरीकांनी सर्व खड्ड्यांचे पुष्पहार अर्पण करून पूजन केले व प्रशासनाचा निषेध केल्याचे अध्यक्ष तुकाराम जाधव यांनी सांगितले . यावेळी तुकाराम जाधव यांचेसह रमेश जाधव , बाळासाहेब जाधव, श्रीरंग सावंत, संजय पिंजण, जयवंत पानसरे, सहादू पानसरे, सचिन पानसरे , मनोजकुमार आदि नागरिकांनी उपस्थित राहून निषेध केला .
✍🏻संपादक – देवराम भेगडे
