चिंचोलीत संयुक्त जयंती उत्साहात संपन्न
देहूरोड : चिंचोली येथे संयुक्त जयंती महोत्सव समिती व वंदना कमेटी यांच्या विद्यामाने भारतरत्न भारतीय घटनेचे शिल्पकार परमपूज्य डॉ बाबासाहेब आंबेडकर तसेच तथागत भगवान गौतम बुद्ध यांची संयुक्त जयंती नुकतीच विविध कार्यक्रमांचे आयोजन करून मोठ्या उत्साहात साजरी करण्यात आली .
पहिल्या दिवशी सकाळी भीमज्योत काढण्यात आली. पंचशील ध्वजारोहन आणि वंदनेचा कार्यक्रम घेण्यात आला. सायंकाळी ५ वाजता भगवान गौतम बुद्ध आणि भारतरत्न डॉ. बाबासाहेब आंबेडकर यांची परिसरात भव्य मिरवणूक काढण्यात आली . देहूरोड पोलीस स्टेशनचे वरिष्ठ पोलीस निरीक्षक विक्रम बनसोडे यांच्या हस्ते डॉ.बाबासाहेब आंबेडकर यांच्या पुतळ्यास व भगवान गौतम बुद्ध यांच्या मूर्तीस पुष्प अर्पण करून वंदना घेऊन मिरवणूकीला प्रारंभ करण्यात आला.
चिंचोली येथील बुद्ध विहारास नाव नसल्याने चिंचोली बुद्ध विहार असे संबोधण्यात येत होते. त्याचे नामकरण भन्ते महाबोधी आर्याजी (भिक्षुनी ) यांच्या हस्ते नामकरणाचे अनावरण ‘विश्व शांती बुद्ध विहार ‘असे करण्यात आले. यावेळी परिसरातील महिलांची उपस्थिती लक्षणीय होती .यावेळी उपस्थितांना लाडू वाटप करून आनंद साजरा करण्यात आला. कार्यक्रमातंर्गत अन्नदान करण्यात आले . रात्री ऑर्केस्ट्रा , बुद्ध व भीम गीतांचा सदाबहार कार्यक्रम सादर करण्यात आला. देहूरोड पोलीस ठाण्याकडून पोलिसांचा चोख बंदोबस्त ठेवण्यात आला होता.
✍🏻संपादक – देवराम भेगडे
