देहू-देहूरोड परिसरात मकर संक्रांत उत्साहात साजरी: मकर संक्रांतीनिमित्त महिलावर्गात मोठा उत्साह
किवळे : देहू – देहूरोड परिसर , किवळे, विकासनगर , मामुर्डी , साईनगर ,गहुंजे व सांगवडे परिसरात मकर संक्रांतीचा सण गुरुवारी उत्साहात साजरा करण्यात आला . बहुतांशी सुवासिनी स्त्रियांनी घराजवळ असणार्या विविध देव -देवतांच्या मंदिरांत सुगडदान करण्यास प्राधान्य दिले .
मकर संक्रांतीनिमित्त महिलावर्गात मोठा उत्साह दिसत होता . परिसरातील बहुतांशी सुवासिनी स्त्रिया श्रीक्षेत्र देहूगाव , आळंदी तसेच घोरावडेश्वर डोंगरावरील मंदिरात सुगडदान करण्यासाठी जात असतात मात्र संबंधित मंदिरे बंद असल्याने सुवासिनी घराजवळ असलेल्या मंदिरांत सुगडदान करण्यासाठी गेल्या होत्या .
ज्या कुटुंबात मुलीचे लग्न झाल्यावर पहिले वर्ष आहे, त्यांच्या सासरहून त्या मुलीला साडी व ‘ओवसा ‘ (वानवसा) आल्याचे मकर संक्रातीच्या दिवशी दिसून आले. ( ‘ओवसा ‘ म्हणजे ऊस , गाजर ,हरबरा , बोरे ,गव्हाच्या ओंब्या , व तिळगुळ आदी.) भावकीतील व त्या-त्या आळीतील सुवासिनी स्त्रियांना ओवसा पाहण्यासाठी बोलावण्याची स्त्रियांची लगबग जाणवत होती. तसेच ज्या कुटुंबातील मुलाचे लग्न झाल्यावर पहिले वर्ष आहे, त्यांच्या घरी सबंधित मुलीकडे साडी व ओवसा पाठविण्याची लगबग दिसत होती. मकर संक्रांत हा स्नेह वाढविणारा सण असल्याने व परंपरेने सुवासिनी स्त्रियांनी हळदी कुंकू , तिळगुळ व नित्योपयोगी वस्तू एकमेकींना भेट म्हणून दिल्या .लहान मुले व पुरुष मंडळींही आपल्या मित्र -मैत्रिणींना तिळगुळ देत ” तिळगुळ घ्या , गोड बोला ” असे आवर्जून सांगत होते. मकर संक्रांतीला तिळाचे महत्व विशेष असून तिळाच्या अंगी जशी स्निग्धता आहे, तशी स्निग्धता स्नेह रूपाने आपल्या मित्र मंडळींमध्ये निर्माण व्हावी, अशी यामागे प्रत्येकाची भावना असते . एकमेकांना संक्रातीच्या शुभेच्छा देण्यासाठी संत तुकाराम महाराजांचा ‘ देव तिळी आला । गोडे गोड जीव झाला ।। ‘ हा अभंग समाज माध्यमांमध्ये सर्वाधिक दिसून येत होता.
✍🏻संपादक – देवराम भेगडे
