विद्यार्थिनींना अवांतर वाचनासाठी प्रेरणादायी पुस्तकांची भेट: देहूतील अभंग प्रतिष्ठानचा उपक्रम
देहू : येथील अभंग प्रतिष्ठानच्या २२ व्या वर्धापन दिनाच्या निमित्ताने व क्रांतीज्योती सावित्रीबाई फुले जयंतीच्या निमित्ताने पुण्यश्लोक अहिल्यादेवी होळकर कन्या वसतीगृहातील विद्यार्थिनींना अवांतर वाचनासाठी प्रेरणादायी पुस्तकांची भेट देण्यात आली. अभंग प्रतिष्ठान गेली २२ वर्ष सातत्याने विविध सामाजिक उपक्रमातून विधायक कार्य करीत आहे.
वाचनवेड संस्थेचे किरीटी मोरे व मयूर शेठ यांच्या विशेष सहकार्याने ही पुस्तके भेट देण्यात आली. तसेच देहू प्राथमिक आरोग्य केंद्राचे प्रमुख डॉ. किशोर यादव यांच्या विशेष सहकार्याने येथील मुलींसाठी दैनंदिन वापरातील साहित्य भेट देण्यात आले.
‘ लहान वयापासून वाचनाची गोडी लागली की वाचनाचा संस्कार मनावर प्रतिबिंबित होतो. या वाचनातुन जीवनाची वैचारिक जडणघडण होऊ लागते. जीवनातील स्वप्न सत्यात आणण्यासाठी मार्गदर्शन लाभते.’ अशा भावना याप्रसंगी जगदगुरू संत तुकाराम महाराज संस्थानचे माजी अध्यक्ष श्री. पुरूषोतम महाराज मोरे व प्राथमिक आरोग्य केंद्राचे प्रमुख डॉ. किशोर यादव यांनी त्यांच्या मनोगतात व्यक्त केल्या. यावेळी प्रा.विकास कंद, अभंग प्रतिष्ठानचे अध्यक्ष सचिन लिंभोरे, उपाध्यक्ष सलिम मुलाणी, बिभिषन खोसे, अनिल गायकवाड व अभंग प्रतिष्ठानचे सदस्य आदि मान्यवर उपस्थित होते.
✍🏻संपादक – देवराम भेगडे
