देहूरोड कॅन्टोन्मेंट : घन कचरा व्यवस्थापन शुल्क रद्द करण्याची सर्वपक्षीयांची कॅन्टोन्मेंटकडे मागणी : पालखी प्रस्थानापूर्वी चिंचोलीतील विसावा स्थळासह पालखीमार्गावरील सर्व समस्या दूर करा – स्थानिकांची मागणी ; सिईओ हेमंत यादव यांनी जाणून घेतल्या विविध समस्या
देहूरोड : संत तुकाराम महाराज पालखीच्या चिंचोली येथील विसावा स्थळी वारकरी व दर्शनाला येणाऱ्या भाविकांची गैरसोय दूर करण्यासाठी तातडीने उपाययोजना कराव्यात, पालखी मार्गावरील सरंक्षक बाजू पट्टया मजबूतीकरण करणे, चिंचोली परिसरातील रस्त्यालगत खोदलेले धोकादायक चर बुजविणे , अनावश्यक गतिरोधक काढून इतर गतिरोधक नियमानसार बांधावेत तसेच मालमत्ता करात या वर्षी लावलेले घन कचरा व्यवस्थापन शुल्क तातडीने रद्द करून बिले घरपोच द्यावीत, अशी मागणी सर्वपक्षीय पदाधिकाऱ्यांसह स्थानिक ग्रामस्थांनी बोर्डाचे मुख्य कार्यकारी अधिकारी हेमंत यादव यांच्याकडे केली .
येत्या आषाढी पायी वारीच्या निमित्ताने संत तुकाराम महाराज पालखी मार्ग रुंदीकरण करणे , चिंचोली येथील पालखी विसावा तळावरील समस्या दूर करणे तसेच कॅन्टोन्मेंट भागातील पालखी मार्गावरील विविध समस्या दूर करण्याबाबतचे निवेदन यावेळी यादव यांना देण्यात आले . यावेळी बोर्ड सदस्य ॲड कैलास पानसरे , माजी उपाध्यक्ष ॲड प्रविण झेंडे , पोपटराव भेगडे , ॲड कृष्णा दाभोळे , अतुल मराठे , पंडीत जाधव , बाळासाहेब जाधव , संदीप बालघरे , देवराम भेगडे , सुर्यकांत सुर्वे , दिपक चौघुले , महेश गायकवाड आदि तसेच कार्यालय अधिक्षक अजय चौधरी , महसुल अधिक्षक राजू जाधव , सुनिल गुरव , दिपक अडसूळ आदि उपस्थित होते . यावेळी ॲड झेंडे , दाभोळे , सुर्वे , भेगडे , चौघुले आदिंनी विविध समस्या मांडल्या .
मालमत्ता कराच्या बिलांमध्ये प्रथमच आकारलेले घन कचरा व्यवस्थापन शुल्क तातडीने रद्द करण्याची मागणी उपस्थितांनी केली . यावेळी बोर्ड सदस्य ॲड पानसरे यांनी वेळेत कर भरणाऱ्यांना सुट देण्याची मागणी केली . झेंडे यांनी मिळकत कर बिले घरपोच अगर पीडीएफ स्वरूपात देण्याची मागणी केली सुर्वे यांनी कचऱ्यावर प्रक्रिया केली जात नसल्याने संबंधित शुल्क आकारू नये , अशी मागणी केली . इतर स्थानिक स्वराज्य संस्थामध्ये घन कचरा व्यवस्थापन शुल्क आकारले नसल्याने ते रद्द करून कॅन्टोन्मेंटने सुधारीत बिले द्यावीत , असे ॲड दाभोळे , बाळासाहेब जाधव यांनी सुचविले . देवराम भेगडे यांनी ई छावणी पोर्टलवर बिल भरताना येणाऱ्या समस्या दूर करून नागरिकांना ऑनलाईन बिले भरणे , स्कॅनर , धनादेश सुविधा उपलब्ध करण्याबाबत सुचविले .
‘ पालखी तळासह पालखी मार्गावरील समस्या दूर करण्यासाठी उपाययोजना करण्यात येणार आहेत . घन कचरा व्यवस्थापन शुल्क आकारणीबाबत लवकरच निर्णय घेऊन कळविण्यात येईल . ‘ हेमंत यादव , प्रभारी मुख्य कार्यकारी अधिकारी , देहूरोड कॅन्टोन्मेंट बोर्ड .
