देहूरोड ते एम बी कॅम्प रस्त्यावर बांधलेल्या चुकीच्या गतिरोधकांमुळे वाहनचालक त्रस्त ; नियमानुसार गतिरोधक बांधा – सुर्यकांत सुर्वे यांच्यासह वाहनचालकांची मागणी
देहूरोड : इंडियन रोड काँग्रेसचे नियम डावलून देहूरोड कॅन्टोन्मेंट बोर्डाने देहूरोड – एम बी कॅम्प रस्त्यावर व विकासनगर रस्त्यावर चुकीच्या पद्धतीने १६ गतिरोधक बांधले आहेत . १०० मीटर अंतरात चक्क १६ गतिरोधक उभारण्यात आल्याची माहिती समोर आली असून इंडियन रोड काँग्रेसचे निकष डावलून उंबाऱ्यासारखे उंच तसेच दोन फुटावर दोन दोन गतिरोधक बांधल्याने दुचाकीस्वार व मोटारचालक त्रस्त झाले आहेत . दोन दिवसांत अनेक महिलांच्या दुचाकीस्वारांचा गतिरोधकांमुळे अपघात झाला असल्याचे नागरिकांनी सांगितले आहे .
कॅन्टोन्मेंट प्रशासनाने देहूरोड ते विकासनगर रस्त्यावर शंकर मंदिर परिसर व एम बी कॅम्प रस्त्यावर शंभर मीटर अंतरात दोन-दोन फुट अंतर सोडून एकूण १६ गतिरोधक बांधले आहेत . सदर गतिरोधक नियम डावलून उभारले असून संबंधित गतिरोधकांवर पांढरे पट्टे नसल्याने वाहने आदळून अपघाताला निमंत्रण मिळत आहे. वाहनचालक व नागरिक पुरते त्रस्त झाले असून आरोग्याचा प्रश्न उपस्थित होऊ लागला आहे . उच्च न्यायालयाचे आदेश असताना तसेच रस्त्यांवर गतिरोधक बांधण्याकरीता इंडियन रोड काँग्रेसचे निकष पाळून गतिरोधक बांधणे क्रमप्राप्त असताना सर्व निकष आदेश धाब्यावर बसवून कॅन्टोन्मेंटने नियमबाह्य गतिरोधक बांधले असल्याचे आढळून आले आहेत . रात्रीचेवेळी गतिरोधक दिसण्यासाठी परावर्तक लावण्यात आलेले नाहीत. ‘ पुढे गतिरोधक आहे’ असा एकही फलक कोठेही दिसून आला नाही. परिणामी रात्री अनेक वाहने आदळून तसेच अचानक गतिरोधक दिसल्याने अपघात होण्याचे प्रमाण वाढले असून गतिरोधक नियमानुसार बांधावेत अशी मागणी परिसरातील वाहन चालकांतून होत आहे . भाजपचे शहर उपाध्यक्ष सुर्यकांत सुर्वे यांनी कॅन्टोन्मेंटचे मुख्य कार्यकारी अधिकारी यांना निवेदन दिले असून अपघात टाळण्यासाठी निकष पालन करून गतिरोधक बांधावेत , असे नमूद केले आहे .
इंडियन रोड काँग्रेसचे गतिरोधक बांधण्याचे हे निकष :
वाहतूक पोलिसांनी शिफारस केलेल्या ठिकाणी तसेच शाळा, दवाखाने , बालवाडी , अंगणवाडी आदी महत्वाच्या ठिकाणी पोलिसांच्या परवानगीने गतिरोधक बांधण्याची पद्धत आहे मात्र गतिरोधक बांधताना गतिरोधकांची रुंदी 3.7 मीटर ठेवावी , उंची 10 सेंमी , गतिरोधकाचा दोन्ही बाजूंचा उतार 1.20 मीटर ठेवावा , दोन गतिरोधकांतील अंतर 100 ते 120 मीटर ठेवावे, गतिरोधकाच्या अगोदर 40 मीटर अंतरावर ‘पुढे गतिरोधक आहे ” असा मार्गदर्शक फलक लावण्यात यावा , गतिरोधकावर पांढरे व काळे पट्टे मारण्यात यावेत , तसेच रात्रीचेवेळी गतिरोधक दिसण्यासाठीपरावर्तक ( कॅट आय ) बसवावेत असे निकष निश्चित करण्यात आलेले आहेत .
‘ गतिरोधक बांधण्याचे निकषानुसार सर्व गतिरोधक बांधणे आवश्यक आहे . शंकर मंदिर व महात्मा गांधी विद्यालयाजवळ बांधलेल्या चुकीच्या गतिरोधकांमुळे अपघात होऊ लागले आहेत . त्यामुळे तातडीने चुकीचे गतिरोधक काढून निकषानुसार गतिरोधक बांधावेत . ‘ सुर्यकांत सुर्वे , उपाध्यक्ष , देहूरोड शहर भाजपा .
✍🏻संपादक – देवराम भेगडे
