जिल्हास्तरीय मल्लखांब स्पर्धेत सांगवडे शाळेचा सलग दुसऱ्या वर्षी व्दितीय क्रमाक
सांगवडे (मावळ ) : जिल्हास्तरीय मल्लखांब स्पर्धेत सांगवडे येथील जिल्हा परिषद प्राथमिक शाळेने उत्कृष्ट कामगिरी करत सलग दुसऱ्यांदा द्वितीय क्रमांक पटकावला.
पुणे जिल्हा परिषद आयोजित यशवंतराव चव्हाण कला, क्रिडा व सांस्कृतिक स्पर्धेत अस्सल मराठी मातीतील मर्दानी खेळ मल्लखांब क्रिडा प्रकारात जिल्हा परिषद प्राथमिक शाळा, सांगवडे ( मावळ, जिल्हा पुणे) या शाळेने उत्कृष्ट क्रीडा कामगिरी करत द्वितीय क्रमांक प्राप्त केला आहे. ही स्पर्धा फुलगाव येथील नेताजी सुभाष चंद्र बोस सैनिकी विद्यालय येथे पार पडली.या यशाबद्दल सांगवडे शाळेचे अभिनंदन होत आहे.
स्पर्धेत जिल्ह्यातील विविध प्राथमिक शाळांमधील विद्यार्थ्यांनी सहभाग नोंदविला होता. सांगवडे शाळेच्या विद्यार्थ्यांनी मल्लखांबातील कौशल्यपूर्ण,नेत्रदीपक व चपळ सादरीकरण करत सांगवडे शाळेचा व मावळ तालुका शालेय शिक्षण विभागाचा नावलौकिक वाढविला. या यशात क्रीडा शिक्षक माधव गुरव यांचे नियोजनबद्ध प्रशिक्षण व मार्गदर्शन मोलाचे ठरले.
स्पर्धेतील यशामुळे विद्यार्थ्यांमध्ये क्रीडाविषयक आवड निर्माण होऊन क्रीडा क्षेत्रात पुढे जाण्यास प्रेरणा मिळेल, अशी भावना मावळ तालुका शिक्षण विभागामार्फत गटशिक्षणाधिकारी रोडगे यांनी व्यक्त केली. सरपंच रोहन जगताप, प्रशिक्षक सुधीर मोकाशी ,शालेय व्यवस्थापन समिती अध्यक्ष महेंद्र राक्षे व माजी मुख्याध्यापक संदीप सकपाळ यांचे सहकार्य लाभले.
शाळेच्या मुख्याध्यापक गोरसे , शिक्षकवृंद ओहोळ , भोरकडे ,शिरसाट ,सांबर यांचेसह सर्व शालेय व्यवस्थापन समिती सदस्य पालक तसेच समस्त ग्रामस्थांनी विद्यार्थ्यांचे अभिनंदन केले . पुढील क्रीडा वाटचालीस विद्यार्थ्यांना शुभेच्छा दिल्या.
✍🏻संपादक – देवराम भेगडे
