देहूतील रयत संकुलात खो-खो मैदानाचे उद्घाटन
अभंग प्रतिष्ठानच्या माध्यमातून महिंद्रा लॉजिस्टीक कंपनीने बनवले आधुनिक मैदान
देहू : येथे रयत शिक्षण संस्था अंतर्गत रयत संकुलात सुसज्ज लाल मातीच्या खो-खो मैदानाचा उद्घाटन सोहळा उत्साहात संपन्न झाला.
देहूतील अभंग प्रतिष्ठानच्या माध्यमातून व महिंद्रा लॉजिस्टीक कंपनी (चाकण प्लांट) यांच्या विशेष सहकार्याने संत तुकाराम विद्यालय, कै. शंकरराव मोरे ज्युनिअर कॉलेज व संत जिजाबाई कन्या विद्यालय येथे हे आधुनिक मैदान तयार करण्यात आले आहे. खो खो मैदानाचे उद्घाटन देहू रयत संकुलाचे देणगीदार नारायण शंकरराव मोरे, संत तुकाराम महाराज संस्थांनचे माजी अध्यक्ष पुरुषोत्तम महाराज मोरे आणि महिंद्रा अँड महिंद्रा कंपनीचे ऑपरेशन हेड (ऑटो सेक्टर) निंबा भामरे यांच्या शुभहस्ते करण्यात आले. यावेळी देहूच्या माजी सरपंच रत्नमाला करंडे, शिवसेना शहरप्रमुख सुनील हगवणे, देहू राष्ट्रवादी काँग्रेस अध्यक्ष संदीप शिंदे, बंडाभाऊ गायकवाड, अभंग प्रतिष्ठानचे अध्यक्ष सचिन लिंभोरे, उद्योजक शिवाजी टिळेकर, उद्योजक विशाल झेंडे , संत जिजाबाई कन्या विद्यालयाच्या मुख्याध्यापिका निवेदिता पासलकर, पर्यवेक्षिका मनिषा निकम, संत तुकाराम विद्यालयाच्या मुख्याध्यापिका विद्या कांबळे, पर्यवेक्षिका पठाण , अभंग प्रतिष्ठानचे सदस्य व रयत संकुलातील सर्व शिक्षकवृंद मोठ्या संख्येने उपस्थित होते.
कार्यक्रमाची सुरुवात कर्मवीर भाऊराव पाटील व लक्ष्मीबाई भाऊराव पाटील यांच्या प्रतिमा पूजनाने झाली. कार्यक्रमाचे प्रास्ताविक प्रा . विकास कंद यांनी केले. रयत संकुलाच्या वतीने मान्यवरांचे स्वागत व सत्कार करण्यात आला. महिंद्रा लॉजिस्टिक कंपनीकडून कन्या विद्यालयातील ६० खो खो खेळाडूंना खेळाच्या गणवेशाचे वाटप मान्यवरांच्या करण्यात आले. सूत्रसंचालन प्रियदर्शनी पाटील यांनी केले . राष्ट्रीय खो खो प्रशिक्षक संदीप चव्हाण यांनी आभार मानले.
सुसज्ज खो-खो मैदानामुळे विद्यार्थ्यांना दर्जेदार क्रीडा सुविधा उपलब्ध होणार असून त्यांच्या क्रीडा कौशल्याला नवे बळ मिळणार आहे. या उपक्रमाबद्दल उपस्थित मान्यवरांनी समाधान व्यक्त करत विद्यार्थ्यांना राज्य व राष्ट्रीय स्तरावर यश संपादन करण्यासाठी शुभेच्छा दिल्या.
✍🏻संपादक – देवराम भेगडे
