देहूत त्रिदिवसीय गाथा पारायणाची सांगता :
प्रविण कदम यांना संत चोखामेळा महाराज सेवा पुरस्कार प्रदान
देहू : सकळ संत विचार समितीच्या वतीने श्रीक्षेत्र देहू येथे संत चोखामेळा महाराज तुकयाबंधू श्री संत कान्होबाराय, श्री संत सेना महाराज श्री संत गोरोबा काका महाराज, श्री संत सावता महाराज, श्री संत बहिणाबाई गाथा पारायण सोहळा व त्रिदिवसीय किर्तन महोत्सवाची सांगता सोमवारी (दि १२ ) झाली . या पारायण सोहळ्याचे हे आठवे वर्ष होते.
किर्तन महोत्सवात ह.भ.प. महावीरमहाराज सूर्यवंशी, ह.भ.प.पोपटमहाराज कासारखेडेकर यांची किर्तन सेवा झाली . ह.भ.प. रंगनाथ महाराज नाइकरे यांच्या काल्याच्या कीर्तनाने सोहळ्याची सांगता झाली.
सकळ संत विचार समितीच्या वतीने दरवर्षी समाजामध्ये निरपेक्ष भावनेने सर्वसमावेशक लोकहिताचे व सामाजिक समता प्रस्थापित व्हावी यासाठी कार्य करणाऱ्या व संत विचाराने लोकसेवेचे कार्य करणाऱ्या सेवाभावी व्यक्तिमत्त्वास “ संत चोखामेळा महाराज सेवा पुरस्कार”
देऊन विशेष गौरव करण्यात येतो.
यावर्षीचा संत चोखामेळा महाराज सेवा पुरस्कार अहिल्यानगर येथील स्नेहालय या सामाजिक संस्थेतील, उडान प्रकल्पाचे प्रमुख समाजसेवक, प्रविण शाम कदम यांना देण्यात आला. कदम हे वंचित महिला भगिनींच्या पुनर्वसनासाठी, बालविवाह प्रतिबंध कार्यासाठी, झोपडपट्टीतील मुलांच्या शिक्षणासाठी अत्यंत सेवाभावनेने कार्य करीत आहेत.
प्रविण कदम यांना सेवा पुरस्कार श्रीक्षेत्र भंडारा डोंगर ट्रस्टचे अध्यक्ष बाळासाहेब काशीद, महाराष्ट्र राज्य सकळ संत विचार समितीचे अध्यक्ष हभप संतोषमहाराज काळोखे, विठ्ठल-रखुमाई देवस्थानचे विश्वस्त शिवाजी महाराज मोरे, संत तुकाराममहाराज संस्थानचे विश्वस्त उमेशमहाराज मोरे, माजी विश्वस्त माणिकमहाराज मोरे, संतसेवक मुक्ताजी नाणेकर, देहू नगरपंचायतीच्या सहाय्यक मुख्य अधिकारी प्रियंकाताई कदम, हभप प्रशांतमहाराज मोरे, समाजभूषण संदीप बोत्रे, स्नेहालय संस्थेचे संचालक किरीटी मोरे, पंचायत समितीचे माजी सदस्य बाळासाहेब काळोखे, माजी उपसरपंच स्वप्निल काळोखे , नगरसेवक अमोल काळोखे, नगरसेवक आनंदा काळोखे यांच्या उपस्थितीत प्रदान करण्यात आला.
कार्यक्रमाचे सूत्रसंचालन प्रा. विकास कंद व संदीप बोत्रे यांनी केले. प्रास्ताविक विलास काळोखे यांनी केले . माजी नगरसेवक सचिन कुंभार यांनी आभार मानले .
