पिंपरी चिंचवड शहर देशात प्रथम क्रमांकाने ओळखले जाईल असे काम करू – शत्रुघ्न काटे
मतदारांनी भारतीय जनता पार्टीवर दाखवलेला विश्वास सार्थ ठरवू
पिंपरी : नुकत्याच झालेल्या निवडणुकीत भारतीय जनता पार्टीला पिंपरी चिंचवड महानगरपालिकेत मतदारांनी एक हाती सत्ता देऊन विश्वास व्यक्त केला आहे. मतदारांच्या विश्वासास पात्र ठरून पिंपरी -चिंचवड शहर देशात प्रथम क्रमांकाने ओळखले जाईल असे काम करू . सर्व आमदार, खासदार, नगरसेवक, पक्ष पदाधिकारी व कार्यकर्ते यांना विश्वासात घेऊन नियोजनबद्ध पद्धतीने आगामी काळात काम करू असे प्रतिपादन भाजपा शहराध्यक्ष शत्रुघ्न काटे यांनी केले .
पिंपरी येथे झालेल्या पत्रकार परिषदेला आमदार महेश लांडगे, आमदार अमित गोरखे, माजी खासदार अमर साबळे, युवा मोर्चा प्रदेशाध्यक्ष अनुप मोरे, प्राधिकरणचे माजी अध्यक्ष सदाशिव खाडे, दक्षिण भारत आघाडी प्रदेशाध्यक्ष राजेश पिल्ले, शहर प्रवक्ता कुणाल लांडगे, शहर सरचिटणीस ॲड. मोरेश्वर शेडगे, विकास डोळस, मधुकर बच्चे आदी उपस्थित होते.
काटे यांनी सांगितले की, २०१७ च्या सार्वत्रिक निवडणुकीमध्ये शहरातील नागरिकांनी मुख्यमंत्री देवेंद्र फडणवीस यांच्या मार्गदर्शनाखाली व तत्कालीन शहराध्यक्ष तथा आमदार लक्ष्मण जगताप, आमदार महेश लांडगे, माजी खासदार अमर साबळे यांच्या नेतृत्वाखाली मनपामध्ये भाजपाला बहुमत दिले. त्यानंतरच्या काळात झालेल्या विकास कामांमुळे मतदारांनी भाजपावर विश्वास व्यक्त केला आहे.
आता मेट्रोचे विस्तारीकरण, वाहतूक व्यवस्थेत सुधारणा, नियमित पाणीपुरवठा, नदी सुधार योजना, आरोग्य, वैद्यकीय, शिक्षण, कला, क्रीडा, महिला सुरक्षा, कायदा सुव्यवस्था, पर्यावरण अशा सर्व क्षेत्रांमध्ये पिंपरी चिंचवड महानगरपालिका देशात प्रथम क्रमांकाने ओळखली जावी यासाठी नियोजन केले जाईल, असे शत्रुघ्न काटे यांनी सांगितले.
मुख्यमंत्री देवेंद्र फडणवीस, भाजपा प्रदेशाध्यक्ष रवींद्र चव्हाण आणि सर्व भाजपाच्या आमदार, खासदारांनी पिंपरी चिंचवड महानगरपालिकेत भाजपची सत्ता यावी यासाठी अमूल्य मार्गदर्शन केले. आमदार महेश लांडगे, आमदार शंकर जगताप, आमदार उमाताई खापरे, आमदार अमित गोरखे, माजी खासदार अमर साबळे तसेच प्रदेश कमिटीचे सर्व पदाधिकारी, कोअर कमिटीचे सर्व सदस्य, सर्व माजी नगरसेवक, भाजपाच्या सर्व आघाडीचे अध्यक्ष प्रमुख पदाधिकारी, मंडल अध्यक्ष, बुथ प्रमुख, स्वयंसेवक यांनी सर्वांनी एकत्रित या निवडणुकीत परिश्रम घेतले. मतदारांनी भारतीय जनता पार्टीवर दाखवलेला विश्वास सार्थ ठरवू , असेही शत्रुघ्न काटे यांनी स्पष्ट केले .
✍🏻संपादक – देवराम भेगडे
