श्रीक्षेत्र घोरवडेश्वर : अखंड  हरीनाम सप्ताह, गाथा पारायणाला उत्साहात  सुरुवात ; 

श्रीक्षेत्र घोरवडेश्वर :  महाशिवरात्रीनिमित्त अखंड हरीनाम सप्ताह, गाथा पारायणाला  सुरुवात ; 

संत तुकाराम महाराजांच्या श्रीक्षेत्र भंडारा , श्रीक्षेत्र घोरवडेश्वर व श्रीक्षेत्र भामचंद्र डोंगर या तीनही चिंतनस्थळांचे महत्व अनन्य साधारण  : हभप बापूसाहेब मोरे 

देहूरोड   : संत तुकाराम महाराजांच्या श्रीक्षेत्र भंडारा , श्रीक्षेत्र घोरवडेश्वर व श्रीक्षेत्र भामचंद्र डोंगर या तीनही चिंतनस्थळांचे महत्व अनन्यसाधारण आहे ,असे प्रतिपादन  संत तुकोबारायांचे वंशज कीर्तनकार हभप  बापूसाहेब मोरे यांनी केले .

    महाशिवरात्री यात्रेनिमित्त संत तुकाराम महाराजांचे चिंतन  त्रिस्थळीपैकी  श्रीक्षेत्र घोरवडेश्वर डोंगराच्या पायथ्याला गाथा पारायण व  अखंड हरीनाम सप्ताह सोहळयाला सोमवारी  सकाळी प्रतिमा , मूर्ती , कलश,  वीणा , गाथा, टाळ व मृदुंग पूजनाने सुरुवात झाली असून  सप्ताहात काकडारती, गाथा पारायण, महिला मंडळांची भजने,  कीर्तन व हरिजागर आदी धार्मिक कार्यक्रम भक्तिमय वातावरणात सुरु झाले असून  राज्याच्या विविध भागातील भाविक सहभागी झाले आहेत .

      श्रीक्षेत्र घोरवडेश्वर विकास प्रतिष्ठान, अखंड हरीनाम सप्ताह समिती व घोरवडेश्वर प्रासादिक दिंडी यांच्या विद्यमाने आयोजित अखंड  हरीनाम सप्ताह व गाथा  पारायण सोहळ्याचे उदघाटन संत तुकाराम संस्थानचे माजी  अध्यक्ष पुरुषोत्तममहाराज मोरे , श्रीक्षेत्र भंडारा  डोंगर संस्थानचे अध्यक्ष बाळासाहेब काशीद ,  प्रतिष्ठानचे अध्यक्ष  रघुवीर शेलार, दिंडीचे अध्यक्ष हभप मुकुंदमहाराज राऊत , हरिनाम समितीचे अध्यक्ष तुषार तरस आदिच्या हस्ते प्रतिमा , कलश , विणा , टाळ  ,  गाथा, मृदुंग पूजन करण्यात आले. यावेळी  सर्व आजी माजी पदाधिकारी व भाविक मोठ्या संख्येने उपस्थित होते .

        अखंड  हरिनाम सप्ताहात  हभप यतिराजमहाराज लोहर, नितीनमहाराज काकडे , मुंकुंदमहाराज राऊत , संतोषमहाराज पटारे, विलासमहाराज बागल   हे व्यासपीठ नेतृत्व करीत आहेत . सकाळी  गाथा पारायण सुरु झाले असून उपस्थित मान्यवरांनीही  पारायणात सहभाग घेतला.

     सप्ताहात पहिल्या दिवशी सोमवारी  हभप बापूसाहेब मोरे यांचे कीर्तन झाले .समचरणदृष्टी विटेवरी साजिरी । तेथे हरि माझी वृत्ती राहो ॥ या संत तुकाराम महाराजांच्या अभंगावर कीर्तन केले . तुकोबारायांना जे जे  काही कर्म धर्म आहे त्याचे वर्म समजले होते , असे सांगितले . मोरे महाराजांचा सत्कार संत तुकाराम साखर कारखान्याचे संचालक भरत लिमन ,बापूसाहेब लिमन ,माजी नगरसेवक आप्पा बागल,  देवराम भेगडे व निलेश राक्षे यांच्या हस्ते करण्यात आला . सूत्रसंचालन समितीचे अध्यक्ष तुषार तरस यांनी केले .

     सप्ताहात  दररोज पहाटे काकडा , सकाळी व दुपारी गाथा पारायण ,  महिला भजनी मंडळांची भजन सेवा, हरिपाठ व सायंकाळी सातला कीर्तन, महाप्रसाद व त्यांनतर पंचक्रोशीतील  विविध गावांतील भजनी मंडळांचा हरिजागर कार्यक्रमाचे नियोजन करण्यात आले आहे .