प्रभाग क्रमांक १६ मध्ये सुसज्ज दवाखाना उभारा : नगरसेविका रेश्मा कातळे , नगरसेवक निलेश तरस यांची मनपा आयुक्तांकडे मागणी
किवळे : पिंपरी-चिंचवड महानगरपालिकेच्या प्रभाग क्रमांक १६ मध्ये नागरिकांसाठी सुसज्ज , अत्याधुनिक सुविधांनी युक्त दवाखाना उभारण्याची मागणी नगरसेविका रेश्मा कातळे आणि नगरसेवक निलेश तरस यांनी मनपा आयुक्त विजय सूर्यवंशी यांच्याकडे निवेदनाद्वारे आहे.
किवळे-रावेत – मामुर्डी प्रभाग क्रमांक १६ हा शहरातील सर्वांत मोठा व दाट लोकसंख्येचा प्रभाग असून प्रभागात आरोग्य सुविधांची कमतरता असून नागरिकांना विविध समस्यांना सामोरे जावे लागत आहे. विशेषतः गर्भवती महिला, ज्येष्ठ नागरिक व अपघातग्रस्त रुग्णांना तातडीने उपचार मिळण्यात अडचणी येत आहेत.
सध्या येथील नागरिकांना आकुर्डी येथील कुटे रुग्णालय व चिंचवडच्या तालेरा रुग्णालयावर अवलंबून राहावे लागत आहे. ही रुग्णालये दूर अंतरावर असल्याने आपत्कालीन परिस्थितीत वेळेत पोहोचणे कठीण ठरते, ज्यामुळे रुग्णांच्या जीवितास धोका निर्माण होऊ शकतो.
नगरसेवकांनी मांडलेल्या मागणीत खालील मुद्द्यांवर विशेष भर देण्यात आला आहे.
गर्भवती महिलांसाठी प्रसूतीपूर्व व प्रसूतीनंतर तातडीच्या सुविधा, ज्येष्ठ नागरिकांसाठी नियमित तपासणी व आपत्कालीन सेवा
अपघातग्रस्तांसाठी त्वरित उपचार (ट्रॉमा केअर)
२४x७ डॉक्टर व वैद्यकीय कर्मचारी
आधुनिक यंत्रसामग्री
या संदर्भात महानगरपालिकेच्या आरोग्य विभाग प्रमुख लक्ष्मण गोफणे यांच्यासोबत सकारात्मक चर्चा झाली असून, प्रशासनाने लवकर निर्णय घ्यावा, अशी अपेक्षा व्यक्त करण्यात आली आहे.
नगरसेविका रेश्मा कातळे व नगरसेवक निलेश तरस यांनी सांगितले की, “प्रभागातील प्रत्येक नागरिकाला वेळेवर व दर्जेदार आरोग्य सेवा मिळणे हा मूलभूत हक्क आहे.”
दरम्यान, आयुक्त विजय सूर्यवंशी यांनी या मागणीचा सकारात्मक विचार करण्याचे संकेत दिले असून, लवकरच ठोस निर्णय होण्याची शक्यता आहे.
✍🏻संपादक – देवराम भेगडे
