किवळेत नवनिर्वाचित सदस्यांचा सत्कार :
किवळे ग्रामस्थांचा पुढाकार
किवळे : मनपा प्रभाग क्रमांक १६ मधून निवडून आलेल्या नगरसेवक व नगरसेविकांचा किवळे ग्रामस्थांच्या वतीने नुकताच किवळे येथे सत्कार करण्यात आला . प्रभागाच्या विकासासाठी तत्पर राहून काम करणार असल्याची ग्वाही सर्वच नगर सेवकांनी सत्काराला उत्तर देताना दिली .
किवळे ग्रामस्थांच्या वतीन बापदेव लॉन्स येथे झालेल्या सत्कार समारंभात मनपा प्रभाग १३ मधून (किवळे रावेत मामुर्डी ) निवडून आलेल्या नवनिर्वाचित नगरसेविका ऐश्वर्या राजेंद्र तरस, रेश्मा बापू कातळे , नगरसेवक निलेश गुलाब तरस , धर्मपाल यशवंत तंतरपाळे यांचा किवळेतील ग्रामस्थ , महिला मंडळे व विविध संस्थांच्या वतीने नागरी सत्कार करण्यात आला .
नवनिर्वाचित नगरसेविका तरस , कातळे तसेच नगरसेवक तरस व तंतरपाळे यांनी मनोगत व्यक्त केले . मनपाच्या तिजोरीत खडखडाट असला तरी जास्तीत जास्त विकासकामे करण्यासाठी प्रयत्न करणार असल्याचे सांगितले . प्रभागातील सर्व अत्यावश्यक, प्रलंबित आणि नव्या विकासकामांना प्राधान्य देण्याचे आश्वासन दिले. माजी सरपंच सुदाम तरस , रोहिदास दांगट, बापू कातळे व राजेंद्र तरस यांनी मनोगत व्यक्त केले . कार्यक्रमाला ग्रामस्थ व प्रभागातील विविध सोसायट्यांचे प्रतिनिधी तसेच महिला उपस्थित होत्या .
कार्यक्रमाचे प्रास्ताविक किरण धुमाळ यांनी केले. सूत्रसंचालन शुभम दांगट यांनी केले . राजेश तरस यांनी आभार मानले.
✍🏻संपादक – देवराम भेगडे
