नव्याने विकसित होत असलेल्या बांधकाम प्रकल्पांना  पाणी कनेक्शन देऊ नये

किवळे : विकासनगर , रावेतसह मामुर्डी भागातील नव्याने  विकसित होत असलेल्या  बांधकाम प्रकल्पांना  पाणी कनेक्शन देऊ नये,  अशी मागणी नगरसेविका रेश्मा कातळे यांनी मनपा  आयुक्तांकडे निवेदनाद्वारे केली आहे .

      प्रभागाच्या विविध  भागांत तसेच विविध सोसायट्यांमध्ये  अपुऱ्या दाबाने व  अनियमित पाणीपुरवठा केला जात आहे. नागरिक व महिला वर्ग त्रस्त झाले आहेत . पाणी पुरवठयाबाबत तक्रारी वाढत चालल्या आहेत . या पार्श्वभूमीवर नव्याने विकसित होत असलेल्या परवानगी दिलेल्या व खाजगी  बांधकाम प्रकल्पांना  पाणीपुरवठा करू नये . प्रथम पिण्याचे पाणी, नंतर बांधकामे हा  निकष ठेवावा. पाणीपुरवठ्याची परिस्थिती सुरळीत होत नाही, तोपर्यंत नवीन बांधकामांना पाणीपुरवठा देऊ नये, अशी मागणी निवेदनातून करण्यात आली आहे.