शिवसेना किंगमेकरच्या भूमिकेत आल्याशिवाय राहणार नाही : एकनाथ शिंदे

पिंपरी चिंचवडमध्ये शिवसेना किंगमेकरच्या भूमिकेत आल्याशिवाय राहणार नाही : एकनाथ शिंदे

किवळे :  पिंपरी चिंचवड शहरात परिवर्तन घडवून कारभारी बदलण्याची वेळ आली आहे . शिवसेना मनपाच्या निवडणुकीत किंगमेकरच्या भूमिकेत आल्याशिवाय राहणार नाही, असा विश्वास राज्याचे उपमुख्यमंत्री एकनाथ शिंदे यांनी व्यक्त केला. शुक्रवारी किवळेतील मुकाई चौकात आयोजित जाहीर सभेत मोबाईल फोनद्वारे बोलत होते.

शहरातील शिवसेना उमेदवारांच्या प्रचारार्थ सभेला शिंदे येणार होते. मात्र पुण्यात उशीर झाल्याने त्यांनी मोबाईलद्वारे उपस्थितांशी संपर्क साधला . शहरातील शिवसेनेचे सर्व उमेदवार , नेते इरफान सय्यद, सुलभा उबाळे , विश्वजित बारणे ,  जिल्हा संपर्कप्रमुख बाळासाहेब वाल्हेकर , महानगर प्रमुख राजेश वाबळे , शहर प्रमुख निलेश तरस आदि उपस्थित होते.

उपमुख्यमंत्री शिंदे म्हणाले, ‘शहरात कोणी भ्रष्टाचार केला , कोणी डांबरी रस्त्यावर सिमेंट टाकले , कोणी कुत्र्यांच्या नसबंदीत भ्रष्टाचार केला यावर मी बोलत नाही . शिवसेनेला प्राणाणिकपणे विकास करायचा आहे .’

यावेळी उद्योग मंत्री उदय सामंत यांनी एमआयडीसीतील कारखान्यात स्थानिकांना रोजगार देण्यात येणार असल्याचे सांगितले .

मावळचे खासदार श्रीरंग बारणे यांनी शिवसेनेच्या माध्यमातून घेतलेल्या निर्णयांची माहिती दिली . शहरात मेट्रोचे जाळे निर्माण करण्यात येणार असून वाहतुक कोंडीचा प्रश्नही सोडविण्यासाठी ठोस उपाययोजना करणार असल्याचे सांगितले .

संतभूमी News

✍🏻संपादक – देवराम भेगडे