पिंपरी चिंचवडसह किवळे-रावेत परिसरात वादळी पावसाची हजेरी : वर्दळीच्या रस्त्यांवर पाण्याची तळी
किवळे : विकासनगर , किवळे , रावेत व परिसरात शुक्रवारी सायंकाळी साडेचारच्या सुमारास वादळी वारा व गडगडाटासह वादळी पावसाने हजेरी लावली . किवळेत पावसामुळे वीज पुरवठा खंडीत झाला होता पावसाला सुरुवात होताच वीज पुरवठा खंडित झालेला होता .
गेल्या दोन-तीन दिवसांपासून हवामानात बदल झाल्याने तापमान वाढले होते. उकाडा वाढल्याने नागरिक हैराण झाले होते . शुक्रवारी सायंकाळी पाचच्या सुमारास अचानक ढगांच्या गडगडाटासह वादळी पावसाने हजेरी लावल्याने वाहनचालकांची धांदल उडाल्याचे चित्र दिसून आले . घरी जळणासाठी साठवून ठेवलेल्या गोवऱ्या भिजू नये याकरिता काही महिला धावपळ करताना दिसून आल्या. किवळे-विकासनगर भागात पाऊस सुरु होताच खंडित झालेला वीजपुरवठा सांयकाळी सव्वासहापर्यंत सुरळीत झालेला नव्हता.
महापालिकेने विकासनगर -किवळे येथील इंद्रप्रभा संकुलासमोरील राष्ट्रीय महामार्गाच्या सेवा रस्त्यावर बांधलेल्या पावसाळी गटारात पहिल्याच पावसात पाणी जात नसल्याचे दिसत आहे. विकासनगर भागातून वाहत येणारे पावसाचे पाणी पूर्वीप्रमाणे थेट रस्त्यावरुन वाहत असून इंद्रप्रभा संकुलाच्या महामार्ग चौकाजवळ सेवा रस्त्यावर पाण्याची तळे साचले आहे. महापालिकेच्या संबंधित ठेकेदाराने केलेल्या निकृष्ट कामांमुळे पावसाळी गटारीसह सेवा रस्त्याच्या डांबरीकरणाचा खर्च वाया गेल्याची चर्चा होत असून सर्व कामांची चौकशी करण्याची मागणी होऊ लागली आहे. दरम्यान रस्त्यावर साचत असलेल्या पाण्याने दरवर्षीप्रमाणे यावर्षीही नागरिकांची गैरसोय होणार असल्याचे चित्र दिसत आहे.
✍🏻संपादक – देवराम भेगडे
