देहूरोड कॅन्टोन्मेंटच्या रुग्णालयात  प्रसूतीगृह व मामुर्डीतील नव्या शाळा इमारतीचे लोकार्पण

देहूरोड  :देहूरोड कॅन्टोन्मेंट बोर्डाच्या  हद्दीतील नागरिकांसाठी डॉ. बाबासाहेब आंबेडकर रुग्णालयातील नव्याने उभारण्यात आलेले प्रसूतीगृह आणि  मामुर्डी येथील महात्मा ज्योतिबा फुले प्राथमिक शाळेच्या नवीन इमारतींचा  लोकार्पण  सोहळा  मंगळवार ( दि .१६ ) जून रोजी उत्साहात संपन्न  झाला.

         कॉर्पोरेट सामाजिक दायित्व (सीएसआर ) निधीअंतर्गत जीई एरोस्पेस यांच्या सहकार्याने ही दोन्ही कामे पूर्ण करण्यात आली. यावेळी संरक्षण मालमत्ता दक्षिण कमांडचे प्रधान संचालक  सी. रवींद्र यांच्या हस्ते इमारतीचे उद्घाटन करण्यात आले.  कॅन्टोमेंट बोर्डाचे अध्यक्ष ब्रिगेडियर  आशिष कटोच , छावणी परिषदेचे प्रभारी मुख्य कार्यकारी अधिकारी  हेमंत यादव, बोर्ड सदस्य ॲड कैलास पानसरे, रुग्णालयाचे निवासी वैद्यकीय अधिकारी श्रीनिवास चाटे, जीई एरोस्पेसतर्फे कार्यकारी संचालक अमोल नागर, व्यवस्थापकीय संचालक विश्वजित सिंह, कार्यकारी उड्डाण संचालन प्रमुख मार्सेलो एन. एस. कौटिन्हो, युनायटेड वे ऑफ दिल्लीचे मुख्य कार्यकारी अधिकारी डॉ. सुजीत रंजन व  समन्वयक अजय मनसुके आदी मान्यवर उपस्थित होते.

       नवीन प्रसूतीगृहाचे बांधकामासाठी १ कोटी ४० लाख रुपये व मामुर्डी  शाळा इमारतीसाठी  २ कोटी ४० लाख  खर्च करण्यात आला आहे. या दोन्ही प्रकल्पांमुळे देहूरोड कॅन्टोन्मेंट  व परिसरातील नागरिकांना आधुनिक आरोग्य सुविधा तसेच येथील  विद्यार्थ्यांना गुणवत्तापूर्ण शैक्षणिक वातावरण उपलब्ध होणार आहे.

     आरोग्य व शिक्षण क्षेत्रातील पायाभूत सुविधांच्या विकासासाठी ( सीएसआर ) उपक्रमांचे महत्त्व  उपस्थित मान्यवरांनी अधोरेखित केले. नवीन प्रसूतीगृहामुळे माता व नवजात बालकांना अधिक दर्जेदार आरोग्यसेवा मिळणार असून अत्याधुनिक  प्रयोगशाळेसह , सुसज्ज शाळा इमारतीमुळे विद्यार्थ्यांना प्रसन्न वातावरणात आधुनिक शिक्षणाची संधी उपलब्ध होणार आहे.

देहूरोड परिसर व ग्रामीण  भागातील नागरिकांसाठी येथील  विकासकामांमुळे  सामाजिक प्रगतीला नवी दिशा मिळणार आहे. कार्यक्रमाचे सूत्रसंचालन व आभार प्रदर्शन कॅन्टोन्मेंट महसूल  अधिकारी सुनील गुरव यांनी केले.