चिंचोलीत विसाव्याला भर पावसात पालखीच्या  दर्शनासाठी भाविकांची मोठी गर्दी:

चिंचोलीत विसाव्याला भर पावसात पालखीच्या  दर्शनासाठी भाविकांची मोठी गर्दी: चिंचोली, देहूरोडमध्ये  पालखी रथावर पुष्पवृष्टी ,पावसामुळे  पाणी साचले , परिसर  चिखलमय : वारकऱ्यांसह भाविकांचे हाल : देहूरोडला कॅन्टोनमेंटकडून पालखीचे स्वागत; बोर्डाकडून दिंड्याना फराळाचे वाटप , 

देहूरोड   : पंढरीच्य्या विठुरायाच्या दर्शनासाठी  निघालेला संत तुकाराम महाराजांचा पालखी सोहळा दुपारी दिडच्या  सुमारास देहूरोड लष्करी भागात  जोरदार स्वागत झाल्यानंतर  चिंचोली  येथे पावणेदोनला  दुपारच्या विश्रांतीला चिंचोलीत विसावला.   शनिमंदिरासमोर पालखी रथावर फुलांचा वर्षाव ( पुष्पवृष्टी ) करून स्वागत करण्यात आले.  ज्ञानोबा माऊली तुकाराम नामाचा गजर करीत निघालेले लाखो वारकरी दुपारच्या विश्रांतीसाठी चिंचोलीत थांबले असताना पंचक्रोशीतील विविध गावांतील  भाविकांनी दर्शनासाठी मोठी गर्दी केली होती. मात्र मंगळवारी पहाटेपासून पडत असलेल्या पावसामुळे विसावा परिसरात मोठ्या प्रमाणात चिखल झाला होता . विविध ठिकाणी पाणी साचल्याने वारकऱ्यांचे दुपारच्या भोजनाचे खूप हाल झाले .

          देहूरोडला महामार्गावरील विरस्थळ चौकात कॅन्टोनमेंटकडून पालखीचे स्वागत करण्यात आले.  कॅन्टोन्मेंट बोर्डाकडून दिंड्यांना फराळाचे वाटप करण्यात आले. मुसळधार पाऊस अंगावर झेलत ‘भाग गेला शीण गेला । अवघा झाला आनंद ।। या तुकोबारायांच्या अभंगाप्रमाणे वारकरी मोठ्या आनंदात संतांचे अभंग गात चालले होते.  यावर्षी पालखी सोहळ्यात सहभागी वारकर्यांत तरुणांची संख्या अधिक दिसत होती. साखळी व दागिने चोरांना रोखण्यासाठी विशेष पोलीस पथक तैनात करण्यात आले होते .

      झेंडेमळा येथे ग्रामस्थांनी पालखीचे स्वागत केले . सीओडी डेपोच्या वतीने ब्रिगेडीयर विकांत गंभीर यांच्यासह अधिकारी  तसेच विविध कर्मचारी संघटना प्रतिनिधी यांनी स्वागत केले .  पालखी येण्यापूर्वी पादुका  मंदिर परिसरात पंचक्रोशीतील चिंचोली, किन्हई, कान्हेवाडी, किवळे, विकासनगर, रावेत, गहुंजे आदी गावांतील भाविक मोठ्या संख्येने भर पावसात  दर्शनासाठी सकाळपासून थांबलेले होते. याठिकाणी मुख्य मंदिरासमोर पालखीरथ आल्यांनतर चिंचोली ग्रामस्थ व शनैश्वर देवस्थान समितीच्या वतीने पालखी रथावर पुषवृष्टी करण्यात आली. त्यानंतर परंपरेप्रमाणे संत तुकाराममहाराजांची अभंग व आरती देवस्थानचे अध्यक्ष  दत्तात्रय जाधव , सहायक पोलीस आयुक्त प्रविण मोरे , वरिष्ठ पोलीस निरीक्षक विक्रम बनसोडे यांचे हस्ते झाली. यावेळी बाळासाहेब जाधव , शीतल हगवणे , संजय पिंजण आदि मान्यवर उपस्थित होते . देवस्थान समितीच्या वतीने अध्यक्ष दत्तात्रय जाधव, रमेश जाधव, दत्तात्रय लांडगे, , गोविंद भेगडे, संतोष जाधव , प्रसन्न जाधव  तसेच पदाधिकारी व सदस्यांच्या हस्ते दिंडी चालकांचा व विणेकर्यांचा उपरणे व श्रीफळ देऊन सत्कार केला. पालखी विसावा ठिकाण चिखलमय झाले असतानाही वारकऱ्यांच्या गर्दीने फुलून गेले होते. नजिकच्या दफन भूमीतही वारकरी विसावले होते . पावसामुळे अक्षरक्षः हातावर पत्रावळीत भोजन करीत होते .

      देहूरोडकडे जाणारा  रस्ता पाऊस पडत असताना पावसाळी पोशाख घालून चालणाऱ्या वारकर्यांनी व्यापला होता. दिंड्यांकडून वारकर्त्यांना जेवणासाठी झाडांच्या पानांपासून बनविलेल्या पत्रावळ्या दिल्या जात  असल्याचे दिसून आले .

    चिंचोलीतील विसावा झाल्यानंतर  देहूरोडला साडेतीनच्या सुमारास पालखी सोहळा दाखल झाल्यांनतर देहूरोड येथे महामार्ग चौकात पालखीच्या दर्शनासाठी रावेत, देहूरोड ,किवळे, मामुर्डी व गहुंजेसह मावळातील भाविकांनी मोठी गर्दी केली होती.

          देहूरोड येथील संत तुकाराम महाराज स्वागत प्रवेशद्वार येथे  संत तुकोबांच्या पालखी रथावर तुषार तरस ,मगेश  तरस परिवार, शंकरराव शेलार पतसंस्था ,  राजा शिवछत्रपती मराठा सोसायटीच्या वतीने पुष्पवृष्टी व फराळ वाटप  करण्यात आला  . कॅन्टोनमेंट बोर्डाचे सदस्य ॲड कैलास पानसरे , कॅन्टोन्मेंटचे वरिष्ठ अधिकारी , कर्मचारी   यांनी पालखीचे स्वागत केले. बोर्डाचे  अधिकारी व कर्मचारी आदी उपस्थित होते. बोर्डाच्या वतीने पालखी सोहळ्यातील दिंड्यांतील वारकर्यांसाठी दिंड्यांना  फराळाचे वाटप उपस्थितांच्या हस्ते करण्यात आले. कॅन्टोनमेंट रुग्णालयाच्या वतीने दिवसभर  सुमारे २  हजार  वारकर्यांना आरोग्य सुविधा उपलब्ध करण्यात आली होती.  वारकर्यांची  तपासणी करून व औषधे देण्यात आली. काही वारकर्यांच्या पायांची मालिश करण्यात आली. आवश्यक तपासण्या करण्यात आल्या. बोर्डाचे वैद्यकीय अधिकारी,  कर्मचारी,  नागरी आरोग्य केंद्रातील कर्मचारी आदींनी  सहकार्य केले.

देहू- चिंचोली परिसरात अखंडित वीजपुरवठा  : 

   चिंचोली व देहू परिसरात पालखी सोहळ्याच्या काळात  वीज पुरवठा खंडीत न झाल्याने ग्रामस्थांनी समाधान व्यक्त  करीत अतिरिक्त कार्यकारी अभियंता किरण सरोदे  शाखा अभियंता चौधरी यांना धन्यवाद दिले .