कॅन्टोन्मेंटच्या शितळानगर स्मशानभूमीत मनपाकडून उभारलेली विद्युतदाहिनी झाली सुरू : नगरसेवक धर्मपाल तंतरपाळे यांच्या पाठपुराव्याला यश
देहूरोड : महापालिकेच्या प्रभाग क्रमांक सोळालगत देहूरोड कॅन्टोन्मेंटच्या हद्दीत शितळानगर ( मामुर्डी ) स्मशानभूमीत पिंपरी चिंचवड महापालिकेने बसविलेली विद्युत दाहिनी नुकतीच सुरू झाली आहे . स्मशान भूमीतील समस्या दूर करणेसह विद्युतदाहिनी सुरू करण्यासाठी फुले शाहू आंबेडकर विचार मंचचे अध्यक्ष धर्मपाल तंतरपाळे यांच्या नेतृत्वाखाली आंदोलन करण्यात आले होते .
महापालिकेची सार्वत्रिक निवडूणूक झाल्यानंतर नवनिर्वाचित नगरसेवक धर्मपाल तंतरपाळे यांनी महापालिकेच्या संबंधित अधिकाऱ्यांकडे पत्रव्यवहार करीत सातत्याने पाठपुरावा केल्यानंतर अखेर मनपाने सर्व सोपस्कार पूर्ण करीत विद्युत दाहिनी सुरू केली आहे . याबाबत मनपा प्रशासनाने सर्व वैद्यकिय अधिकारी -शासकीय रुग्णालये , वैद्यकीय अधिकारी यांनी आदेश दिले आहेत. संबंधितांनी या विद्युत दाहिनीचा पास देण्याबाबतच्या सूचना देण्यात आल्या आहेत . देहूरोड कॅन्टोन्मेंटच्या डॉ . बाबासाहेब आंबेडकर रुग्णालय प्रशासनाला पासबाबत कळविण्यात आले आहे .
किवळे- देहुरोडमध्ये प्रथमच विद्युत दाहिनी सेवा झाली उपलब्ध :
कॅन्टोनमेन्ट बोर्डाच्या हद्दीत शेलारवाडी ,कोटेश्वरवाडी , किन्हई व शितळानगर ( मामुर्डी ) येथे स्मशानभूमी असून यातील एकाही स्मशानभूमीत विद्युत दाहिनी नसल्याने परिसरातील नागरिकांची गैरसोय होत होती . याबाबत तत्कालीन बोर्ड सदस्य विशाल खंडेलवाल यांनी विद्युत दाहिनीसाठी २०१९ पासून मनपाकडे मागणी व पाठपुरावा केला होता. परिणामी स्मशानभूमीतील सर्व कामांसाठी १ कोटी ६६ लाख ३८ हजार ५३१ रुपयांची तरतुद करण्यात आली होती असून संबंधित ठेकेदारास १८ महिन्यांची मुदत देण्यात आली होती . मात्र कोरोनाच्या पार्श्वभूमीवर अनेक महिने कामे ठप्प झाली होती . कोरोनानंतर विद्युत दाहिनी सुरू करणे संबंधित देखभालीसह विविध समस्या निर्माण झाल्या होत्या . परिणामी विद्युत दाहिनी सुरू करण्याबबत वेळ जात होता .
✍🏻संपादक – देवराम भेगडे
