महाशिवरात्री यात्रा : श्रीक्षेत्र घोरवडेश्वराचे दर्शनाला डोंगरावर शिवभक्तांची आलोट गर्दी

महाशिवरात्री यात्रा : श्रीक्षेत्र घोरवडेश्वराचे दर्शनाला डोंगरावर शिवभक्तांची आलोट गर्दी , ३ लाखाहून अधिक भाविकांनी घेतले शिवलिंगाचे दर्शन;  ‘ हर हर महादेव ‘चा गजराने दुमदुमला डोंगर;  महाअभिषेक, पूजा, आरती , भजन, कीर्तनासह विविध धार्मिक कार्यक्रमांचे आयोजन

देहूरोड   : महाशिवरात्री  यात्रेनिमित्त मावळ तालुक्यातील  श्री क्षेत्र घोरवडेश्वर डोंगरावरील शिवलिंगाचे दर्शनाचा सुमारे तीन  लाखाहून अधिक भाविकांनी लाभ घेतला.  शनिवारी मध्यरात्रीपसून  महाअभिषेक, पूजा, आरती व विविध धार्मिक विधी संपन्न झाले. शिवलिंगाच्या दर्शनासाठी डोंगरावर शनिवारी रात्रीपासून  भाविकांनी  रांगा लागल्या होत्या.

हर हर महादेवचा गजर : शनिवारी  रात्रीपासून रविवारी मध्यरात्रीपर्यंत गर्दीचा उच्चांक 

     महाशिवरात्रीनिमित्तडोंगरावर आलेल्या  भाविकांमधून  हर हर महादेव , ओम नमः  शिवाय , हर हर भोले नमः शिवाय , बोलो शंकर भगवान की जय “ या नाम घोषाने श्रीक्षेत्र घोरवडेश्वर डोंगर परिसर दुमदुमून गेला होता . युवक व महिलांची संख्या सर्वाधिक दिसून येत होती.

        श्रीक्षेत्र घोरवडेश्वर डोंगरावरील मंदिरात शनिवारी  मध्यरात्रीनंतर घोरवडेश्वर विकास प्रतिष्ठानच्या वतीने घोरवडेश्वर  प्रतिष्ठानचे अध्यक्ष रघूवीर शेलार , कार्याध्यक्ष आनंद भेगडे , हरिनाम समितीचे अध्यक्ष  तुषार तरस , अभिजित भेगडे , शिवाजी सावंत ,   आनंद गोपाळे , राम गराडे , योगेश शेलार आदी विश्वस्त व  पदाधिकाऱ्यांच्या  हस्ते शिवलिंगाला महाभिषेक करण्यात आला . यावेळी  प्रतिष्ठानसह दिंडी व हरिनाम समितीचे पदाधिकारी व विश्वस्त व भाविक मोठ्या संख्येने उपस्थित होते.  अध्यक्ष रघूवीर शेलार , आनंद भेगडे, तुषार तरस   यांच्या हस्ते  महाआरती झाल्यानंतर भाविकांना दर्शनासाठी रांगेतून सोडण्यात आले. दर्शनासाठी शनिवारी  रात्रभर भाविकांची मोठी गर्दी झाली होती . रविवारी दिवसभर गर्दी वाढत गेली .

     घोरवडेश्वर  पायथ्यासह  डोंगरावर,व डोंगर चढणीच्या रस्त्यावर शनिवारी मध्यरात्रीपासून ठिकठिकाणी बेलाची पाने, हार – फुले विकणाऱ्यांनी आपली दुकाने थाटली होती .  या वर्षी भाविक मोठ्या प्रमाणात दर्शनासाठी आले होते .मध्यरात्रीपासून दर्शनासाठी सुरु झालेली भाविकांची मोठी गर्दी दिवसभर भर उन्हातही  टिकून होती .प्रतिष्ठानच्या वतीने भाविकांसाठी डोंगरावर व पायथ्याला फराळाची व पिण्याच्या पाण्याची फराळाची व्यवस्था करण्यात आली होती.गेली ४४ वर्षे प्रतिष्ठानच्या वतीने हा उपक्रम राबविण्यात येत आहे. तसेच अखंड हरिनाम  सप्ताह समितीच्या वतीने पायथ्याला भजन , पारायण व कीर्तन व हरिजागर आदी धार्मिक कार्यक्रम उत्साहात सुरु होते.

       पुणे , पिंपरी – चिंचवड , मावळ तालुक्यासह  देहूरोड परिसर  , तळेगाव,   गहुंजे,  शिरगाव, सांगवडे, दारुंबे , सोमाटणे, धामणे परिसरातून येणाऱ्या भाविकांची संख्या सर्वाधिक होती. डोंगराकडे येणाऱ्या  विविध रस्त्यांवर व महामार्गावर विविध संस्थांनी ठेवलेल्या फळे, फराळ व खिचडीचा लाभ भाविकांनी घेतला .घोरवडेश्वर डोंगराकडे येणारे सर्व बाजूंचे रस्ते पहाटेपासून गर्दीने फुलून गेले होते.  किशोर भेगडे मित्र परिवार , नगरसेवक रघुवीर शेलार स्नेह ग्रुप, जैन युवक संघटना ,विश्व हिंदू परिषद , बजरंग दल, सेवा समिती , अनेक सामाजिक सेवाभावी संस्था व व्यक्तींनी पिण्याच्या पाण्याची , सरबताची  व फराळाची व्यवस्था केली होती .

बेल फुल व कवट खरेदीसाठी भाविकांची गर्दी :  

       डोंगरावर जाणारा पायर्यांचा मुख्य रस्ता अरुंद असल्याने विविध पायवाटांनी डोंगर चढणाऱ्या भाविकांची संख्या अधिक होती.  यात्रेनिमित्त डोंगराच्या पायथ्याला विविध वस्तू विक्री दुकाने, पाळणे , खेळणी , झुक-झुक गाडी, प्रसादाची दुकाने मोठ्या प्रमाणात थाटलेली होती. महाशिवरात्रीनिमित्त बेल, फुले व  कवटाच्या प्रसादाला महत्व असल्याने बेल विक्रेते व कवटाची सर्वाधिक दुकाने दिसत होती. यंदा कवटांची आवक मोठ्या प्रमाणात झाल्याने किंमत कमी झाल्याचे विक्रेत्यांनी सांगितले.

महामार्गासह रस्ते गर्दीने फुलून गेले : 
पुणे – मुंबई राष्ट्रीय महामार्ग दिवसभर गर्दीने फुलून गेला होता. भाविक पीएमपी बस,  खासगी वाहने व रिक्षा अशा मिळेल त्या वाहनाने डोंगराकडे येत होते . दर्शनासाठी येणाऱ्या भाविकांनी आपली चारचाकी वाहने रस्त्यालगत लावल्याने महामार्गावर अधून- मधून वाहतूक कोंडी होत होती. देहूरोड येथील सहायक आयुक्त  कार्यालयापर्यंत वाहनांच्या रांगा लागल्याचे चित्र अधूनमधून दिसत होते. देहूरोड पोलीस ठाणे व वाहतूक विभागाचे  पोलीस कर्मचारी वाहतूक सुरळीत करण्यात दिवसभर व्यस्त होते.

डोंगरासह पायथ्याला चोख  पोलीस बंदोबस्त , स्वयंसेवकांचे सहकार्य : 

       शेलारवाडी परिसरातील रघूवीर शेलार स्नेह ग्रुप , बजरंग दल , विश्व हिंदू परिषद , कुंडमाता मित्र मंडळाच्या स्वयंसेवकांनी सहकार्य केले.   डोंगरावर तळेगाव पोलिसांच्या वतीने पोलीस बंदोबस्त ठेवण्यात आला होता. देहूरोड व  तळेगाव पोलीस ठाण्यामार्फ़त डोंगराच्या पायथ्याला चोख पोलीस बंदोबस्त ठेवण्यात आला होता . वरिष्ठ पोलीस निरिक्षक विक्रम बनसोडे स्वतः उपस्थित होते .

राज्य राखीव पोलीस दलाची  तुकडी तैनात करण्यात आली होती. देहूरोड वाहतूक विभागामार्फत वाहतूक सुरळीत ठेवण्याचा पोलीस अधिकारी व कर्मचारी प्रयत्न करताना दिसत होते.

एकाच दिवसात पायी जाऊन भाविकांनी घेतले तीन डोंगरांचे दर्शन ;

       पंचक्रोशीतील अनेक भाविकांनी महाशिवरात्रीनिमित्त संत तुकाराम महाराजांची साधना स्थळे असलेल्या श्रीक्षेत्र घोरवडेश्वर , भंडारा व भामचंद्र डोंगरावर पहाटेपासून  पायी जाऊन  दिवसभर एकाच फेरीत महादेवाचे दर्शन केले. अशा दर्शन पद्धतीचा अनेक वर्षांपासून परिसरातील अनेक भाविकांचा पायंडा आहे.