देहूतील संत जिजाबाई कन्या विद्यालयाचे लंगडी स्पर्धेत यश : अ आणि ब गटात पटकाविला प्रथम व द्वितीय क्रमांक 

देहू : पिंपरी चिंचवड शारीरिक शिक्षण महामंडळ आयोजित पिंपरी चिंचवड स्कूल ओलंपिया स्पर्धेअंतर्गत लंगडीच्या स्पर्धेत रयत शिक्षण संस्थेच्या  देहू येथील संत जिजाबाई कन्या विद्यालयाच्या २ संघानी खेळाचे उत्कृष्ट प्रदर्शन करीत अ आणि ब गटात प्रथम व द्वितीय क्रमांक पटकाविला .

       लंगडी स्पर्धा शनिवारी  (दि. १४) संभाजीनगर येथील स्वातंत्र्यवीर सावरकर मैदान, सह्याद्री क्रीडा मंडळ, संभाजीनगर येथे उत्साहात पार पडल्या.

 स्पर्धेत १४ वर्षाखालील मुली अ आणि  ब गट तसेच १२ वर्षाखालील मुली अ आणि  ब गट असे एकूण चार संघांनी सहभाग नोंदविला. सर्व संघांनी उत्कृष्ट खेळाचे प्रदर्शन करत दोन्ही वयोगटांत संत जिजाबाई कन्या विद्यालयाच्या मुलींनी  प्रथम व द्वितीय क्रमांक पटकावून विद्यालयाच्या शिरपेचात मानाचा तुरा रोवला.

            लंगडी स्पर्धेसाठी  सर्व खेळाडूंना विद्यालयाचे उपशिक्षक  संदीप चव्हाण यांनी  मार्गदर्शन केले. कन्या विद्यालयाच्या मुख्याध्यापिका  निवेदिता पासलकर व  पर्यवेक्षिका मनीषा निकम यांनी सर्व विजेत्या खेळाडूंचे अभिनंदन करून पुढील वाटचालीस शुभेच्छा दिल्या. स्पर्धतील उल्लेखनीय यशामुळे विद्यालयात आनंदाचे वातावरण असून  अभिनंदनाचा वर्षाव होत आहे .