देहूरोड बाजार पेठेसह परिसरात गणेश जयंती निमित्त विविध धार्मिक कार्यक्रमांचे आयोजन : गणेश याग , प्रवचन , भजन , महाआरती , महाप्रसाद
देहूरोड : बाजार पेठेसह देहूरोड पंचक्रोशीतील किवळे , रावेत शेलारवाडी , साईनगर , मामुर्डी – शितळानगर , किन्हई , झेंडेमळा व चिंचोलीत गणेश जयंतीनिमित्त गुरुवारी (दि. २२ जानेवारी ) पहाटेपासून दिवसभर विविध धार्मिक कार्यक्रमांचे आयोजन करण्यात आले आहे .
देहूरोड येथील सुदर्शन मंडळ वैश्य समाज मंदिर येथे सायंकाळी ४ ते ७ . ३० दरम्यान गणेश याग होणार असून ५१ जोड्या सहभागी सहभागी होणार आहेत . पौराहित्य ११ ब्रम्हवृंद करणार आहेत. सायंकाळी ७.३० से ८ पर्यंत श्रींची महाआरती होणार असून रात्री ८ ते १० दरम्यान महाप्रसाद (भंडारा) वाटप होणार असल्याचे सांगण्यात आले आहे .
देहूरोड येथील त्रिशुल मित्र मंडळाच्या श्री विघ्नहर्ता गणेश मंदिर सातवा वर्धापन दिन व गणेश जयंती निमित्त सकाळी सव्वासात ते पावणेआठ दरम्यान श्रींचा अभिषेक, पूजा , आठ वाजता पुण्याह वाचन , साडेआठला नवग्रह आवाहन, पूजन ,मुख्य देवता पूजन , त्यानंतर होम हवन आदि धार्मिक कार्यक्रम होणार असून सकाळी ११ वाजता हभप प्रमोदमहाराज पवार यांचे प्रवचन होणार आहे . दुपारी सव्वाबारा वाजता श्री गणेश जन्म , पाळणा व आरती होणार असून त्यानंतर महाप्रसाद वाटप होणार आहे .
दुपारनंतर श्री गुरुदत्त महिला भजनी मंडळ, ॐ नमो शिवाय महिला भजनी मंडळ, सद्गुरू भजनी मंडळ यांची भजने होणार आहेत . सायंकाळी सातला मान्यवरांच्या हस्ते महाआरती होणार आहेत. घोरावडेश्वर प्रासादिक दिंडीचे अध्यक्ष ह.भ.प.मुकुंद महाराज राऊत यांचे मार्गदर्शनाने कार्यक्रम होणार आहेत.
✍🏻संपादक – देवराम भेगडे
