गतिरोधकांमुळे विकासनगर – महामार्ग रस्त्यासह परिसरात नागरिकांच्या आरोग्याचा प्रश्न; महापालिकेने इंडियन रोड काँग्रेसचे नियम बसवलेत धाब्यावर
किवळे : महापालिकेने किवळे -विकासनगर भागातील विविध रस्त्यांवर इंडियन रोड काँग्रेसचे निकष डावलून गतिरोधक बांधलेले असल्याचे दिसत आहे. बाह्यवळण महामार्ग ते विकासनगर दरम्यान एक किलोमीटर अंतरात एकूण ११ गतिरोधक असून संबंधित गतिरोधकांवर पांढरे पट्टे नसल्याने अपघाताला निमंत्रण मिळत आहे. वाहनचालक व नागरिक पुरते त्रस्त झाले असून आरोग्याचा प्रश्न उपस्थित होऊ लागला आहे .
किवळे -विकासनगर भागात सार्वधिक वर्दळीच्या ओळखला जाणारा बाह्यवळण महामार्ग ते विकासनगर या एक किलोमीटर अंतराच्या रस्त्यावर एकूण ११ गतिरोधक बांधण्यात आलेले आहेत. गेल्या अनेक महिन्यांपासून पांढरे पट्टे मारलेले नाहीत. एम बी कॅम्प चौकातून बापदेवनगरपर्यंत अर्ध्या किलोमीटर भागात चक्क ७ गतिरोधक बांधलेले आहेत . बापदेवनगर येथील सिद्धिविनायक कॉलनीपासून साळुंके वस्ती दरम्यान असलेल्या १० गतिरोधकांवर पांढरे पट्टे मारलेले असले तरी गतिरोधक निकषाप्रमाणे बांधण्यात आलेले नाहीत . रात्रीचेवेळी गतिरोधक दिसण्यासाठी परावर्तक लावण्यात आलेले नाहीत. विकासनगर भागातील अंतर्गत रस्त्यांवर विविध ठिकाणी ५० हुन अधिक गतिरोधक असून सर्व गतिरोधक निकष डावलून बांधण्यात आलेले आहेत. ‘ पुढे गतिरोधक आहे’ असा एकही फलक कोठेही दिसून आला नाही. विकासनगर ते देहूरोड दरम्यान कॅन्टोन्मेंट हद्दीतील महापालिकेने डांबरीकरण केलेल्या रस्त्यावरही असे फलक लावण्यात आलेले नाहीत. रात्री गतिरोधक दिसण्यासाठी एकही गतिरोधकावर परावर्तक दिसला नाही. परिणामी रात्री अनेक वाहने आदळून तसेच अचानक गतिरोधक दिसल्याने अपघात होण्याचे प्रमाण अधिक आहे .
इंडियन रोड काँग्रेसचे गतिरोधक बांधण्याचे निकष :
रस्त्यांवर गतिरोधक बांधण्याकरीता इंडियन रोड काँग्रेसचे निकष पाळून गतिरोधक बांधावे लागतात . वाहतूक पोलिसांनी शिफारस केलेल्या ठिकाणी तसेच शाळा, दवाखाने , बालवाडी , अंगणवाडी आदी महत्वाच्या ठिकाणी पोलिसांच्या परवानगीने गतिरोधक बांधण्याची पद्धत आहे . गतिरोधक बांधताना गतिरोधकांची रुंदी 3.7 मीटर ठेवावी , उंची 10 सेंमी , गतिरोधकांचा दोन्ही बाजूंचा उतार 1.20 मीटर ठेवावा , दोन गतिरोधकांतील अंतर 100 ते 120 मीटर ठेवावे, गतिरोधकाच्या अगोदर 40 मीटर अंतरावर ‘पुढे गतिरोधक आहे ” असा मार्गदर्शक फलक लावण्यात यावा , गतिरोधकावर पांढरे व काळे पट्टे मारण्यात यावेत , तसेच रात्रीचेवेळी गतिरोधक दिसण्यासाठीपरावर्तक ( कॅट आय ) बसवावेत असे निकष निश्चित करण्यात आलेले आहेत .
निकष धाब्यावर बसवून बांधले गतिरोधक ,वाढले पाठीचे व मणक्याचे आजार
उच्च न्यायालयाचे आदेश असताना तसेच रस्त्यांवर गतिरोधक बांधण्याकरीता इंडियन रोड काँग्रेसचे निकष पाळून गतिरोधक बांधणे क्रमप्राप्त असताना सर्व निकष आदेश धाब्यावर बसवून महापालिकेने नियमबाह्य गतिरोधक बांधले असल्याचे लोकमतने केलेल्या पाहणीत आढळून आले आहेत . वाहनचालक चुकीच्या व नियमबाह्य गतिरोधकांमुळे त्रस्त झाले असून अनेकांना मागील काही महिन्यात पाठीचे व मणक्याचे आजार जडले आहेत . त्यामुळे संबंधित नियमबाह्य गतिरोधक बांधण्यासाठी झालेला खर्च संबंधित जबाबदार अधिकाऱ्यांच्या वेतनातून कापून घेण्यात यावा , सर्व नियमबाह्य गतिरोधक तातडीने काढून टाकावेत तसेच शाळा , रुग्णालये आदी ठिकाणी पोलिसांच्या शिफारसीनुसार नियमानुसार नवीन गतिरोधक बांधावे , अशी मागणी होत आहे .
‘ प्रभागातील किवळे -विकासनगर , रावेत व मामुर्डी भागातील सर्व गतिरोधकांवर पांढरे पट्टे मारण्याबाबत संबधितांना सूचना दिल्या आहेत ‘. ‘ धर्मपाल तंतरपाळे , नगरसेवक .
‘ विकासनगर ते महामार्ग चौक तसेच विकासनगर मुकाईचौकापर्यंतच्या रस्त्यावरील सर्व गतिरोधकांवर लवकरच पांढरे पट्टे मारण्यात येणार आहेत . ‘ संदिप खोत , कनिष्ठ अभियंता , ब प्रभाग .
✍🏻संपादक – देवराम भेगडे
