पीएमपी’च्या प्रवाशांची रोजच होतेय दिशाभूल : पिंपरीकडे येणाऱ्या जाणाऱ्या बसवर चुकीचे फलक ; किवळे व आदर्शनगरच्या सर्व बसवर चुकीचे फलक ; काचेजवळील फलक नजरेत पडत नसल्याने होतोय त्रास, प्रशासनाने तत्काळ उपाययोजना करण्याची मागणी
किवळे: किवळे ते निगडी आणि आदर्शनगर ते निगडी या ‘पीएमपीएल’च्या बसमार्गाचा पिंपरी रोडवरील आंबेडकर चौकापर्यंत गेल्या मे महिन्यात विस्तार करण्यात आला. या मार्ग विस्ताराला प्रवाशांकडून सकारात्मक प्रतिसाद मिळत असला, तरी ८ महिने उलटूनही संबंधित बसवर जुन्याच मार्गाचे इलेक्ट्रॉनिक फलक झळकत आहेत. त्यामुळे प्रवाशांची फसवणूक होत असून, ‘ही बस नेमकी कोठे जाणार?’ असा प्रश्न प्रवाशांना सतत पडत आहे.
- मार्ग विस्ताराअंतर्गत बसमार्ग क्रमांक ३६३ (किवळे-पिंपरी रोड) आणि ३६३-अ (आदर्शनगर पिंपरी रोड) या बस आता थेट आंबेडकर चौकापर्यंत धावत आहेत; परंतु अद्यापही सर्वच बसवर निगडी ते किवळेगाव, किवळे -निगडी किंवा आदर्शनगर-निगडी असेच फलक झळकत असून, इलेक्ट्रॉनिक फलक अद्ययावत करण्यात आलेले नाहीत. काही बसमध्ये फक्त काचेजवळ छोटा फलक ठेवण्यात आलेला असून, तो प्रवाशांच्या नजरेतही पडत नाही. त्याचा त्रास प्रवाशांना होत आहे. येथे योग्य ते फलक बसावावेत, अशी मागणी होत आहे.
चुकीच्या माहितीमुळे प्रवाशांमध्ये संभ्रम
बसच्या फलकांवरील चुकीच्या माहितीमुळे प्रवाशांनी चुकीच्या ठिकाणी उतरण्याची वा बस चुकवण्याची वेळ ओढवली आहे. त्यामुळे प्रवाशांची दिशाभूल होत आहे.पिंपरीपर्यंत जाणार की निगडीपर्यंत समजत नाही. परिणामी बसथांब्यांवर उभ्या असलेल्या प्रवाशांना बस पिंपरीपर्यंत जाणार की फक्त निगडीपर्यंत, हे स्पष्ट समजत नाही.अनेक प्रवाशी चुकीच्या ठिकाणी उतरत आहेत. तर अनेक प्रवाशी बसमध्ये बसत नाहीत. त्यामुळे गैरसोयीचा सामना करावा लागत आहे.
“किवळे व आदर्शनगरहून पिंपरीकडे जाणाऱ्या बसवर चुकीचे फलक लावू नयेत. बस कुठे जाणार आहे, हे स्पष्ट करणारा फलकच लावावा.चालक आणि वाहकांना याबाबत स्पष्ट सूचना दिल्या पाहिजेत. तरीही चुकीचा फलक झळकताना आढळल्यास दंडात्मक कारवाई करण्यात यावी, अन्यथा प्रवाशांची फसवणूकच होत राहील.” बाळासाहेब तरस , अध्यक्ष , बापदेवमहाराज ट्रस्ट , किवळे .
