गरजू विद्यार्थ्यांना शालेय साहित्य वाटप
देहूरोड : कॅन्टोन्मेंट बोर्डातील शाळेतील विद्यार्थ्यांना शालेय वस्तूंची अत्यंत आवश्यकता आहे. या शाळेमध्ये देहूरोड, विकासनगर या पंचक्रोशीतील गरीब व गरजू विद्यार्थी शिक्षण असून विद्यार्थ्यांच्या सर्वांगीण विकासासाठी दानशूर व्यक्तिमत्त्वांनी पुढे येणे आवश्यक आहे. असे प्रतिपादन नगरसेविका ऐश्वर्या तरस यांनी केले .
महात्मा गांधी प्राथमिक शाळेत गरजू विद्यार्थ्यांना वह्या व शालेय साहित्य वाटप कार्यक्रमात तरस बोलत होत्या . कार्यक्रमाचे अध्यक्षस्थानी उद्योजक सतीश अग्रवाल होते. येथील दिवंगत स्वातंत्र्य सैनिक बन्सीलाल लुनावत व दिवंगत विजयलक्ष्मी अग्रवाल यांच्या स्मरणार्थ गरजू विद्यार्थ्यांना शालेय साहित्य वाटप कार्यक्रम आयोजित करण्यात आला होता. यावेळी नगरसेवक धर्मपाल तंतरपाळे, शिवसेनेचे राजेंद्र तरस, उद्योजक रामगोपाल अग्रवाल, युवा आधार संघटनेचे अध्यक्ष श्याम भोसले , कार्यक्रमाचे संयोजक सुरेश लूनावत उपस्थित होते . मधुरा पंडित यांनी ईशस्तवन गायले . कॅन्टोन्मेंट शाळेच्या केंद्रप्रमुख खान या महिन्यात सेवानिवृत्त होत असल्याने त्यांचा विशेष सन्मान मान्यवरांच्या हस्ते करण्यात आला. या शाळेतील दहावी उत्तीर्ण पहिल्या ३ विद्यार्थ्यांचा रोख रक्कम व पुष्पगुच्छ देऊन सन्मान करण्यात आला. त्याचप्रमाणे विकासनगर भागातील वरूण अग्रवाल व मुदस्सर मुजावर हे विद्यार्थी सनदी लेखापाल ही परीक्षा उत्तीर्ण झाल्याबद्दल त्यांच्या सन्मान करण्यात आला. कार्यक्रमाची प्रस्तावना सुरेश लुणावत यांनी , सूत्रसंचालन शकील मुजावर यांनी तर आभार सुनीता लुनावत यांनी मानले . कार्यक्रम यशस्वी होण्यासाठी प्रतीक लुनावत , निखिल दुधावत, ओजस लुनावत, श्याम भोसले , शाळेचे मुख्याध्यापक इरेश हालहरगी आदिंनी विशेष प्रयत्न केले.
✍🏻संपादक – देवराम भेगडे
