देहूरोड-कात्रज बाह्यवळण महामार्ग: किवळे, विकासनगर , रावेत भागात कचऱ्याचे साम्राज्य ;
दुर्गंधीने स्थानिक नागरिकांसह वाहनचालक त्रस्त : कचरा टाकणाऱ्यांवर कारवाई करण्याची मागणी
किवळे : देहूरोड -कात्रज बाह्यवळण महामार्गालगत महापालिका हद्दीतील विकासनगर , किवळे व रावेत भागात सेवा रस्त्यावर व महामार्गालगत मोठ्या प्रमाणात कचरा साचला आहे. किवळे पुलाजवळ, विकासनगर व रावेत भागात मोठ्या प्रमाणात राडारोडा टाकण्यात आल्याचे चित्र दिसत असून महापालिका व राष्ट्रीय महामार्ग प्राधिकरणाचे दुर्लक्ष झाले आहे. महामार्गालगत टाकलेल्या कचऱ्याच्या दुर्गंधीने येथून ये-जा करणारे नागरिक व वाहनचालक त्रस्त झाले आहेत. अस्वच्छता करणाऱ्यांवर कडक कारवाई कधी होणार ,असा सवाल उपस्थित केला जात आहे.
महामार्गावरील विकासनगर , किवळे येथील बाह्यवळण महामार्गावरील उड्डाणपूल , पवना नदीवरील पुल , महामार्ग व द्रुतगती महामार्ग छेद रस्ता , किवळे ते रावेत दरम्यान मुख्य महामार्ग व सेवा रस्ता यातील मोकळी जागा या ठिकाणी मोठ्या प्रमाणात कचरा दिसून येत आहे. शितळानगर ते विकासनगर येथील पेट्रोलपंप दरम्यानच्या भागात महामार्गाच्या सेवा रस्त्यावर अनेक ठिकाणी कचरा टाकण्यात येत आहे . हा कचरा नियमित उचलला जात नाही . गेल्या अनेक दिवसांत कचरा उचलला गेल्या नसल्याचे दिसत असून महापालिकेचे सफाई कर्मचारी येथील कचरा उचलण्याकडे दुर्लक्ष करीत असल्याची तक्रार केली जात आहे. महामार्गावरून गाडीतून ये-जा करणारे , दुचाकीद्वारे येजा करणारे काही नागरिक कचरा महापालिकेच्या घंटागाडीत न टाकता कचऱयाच्या पिशव्या महामार्गालगत व सेवा रस्त्यावर टाकून अस्वच्च्छता करीत असल्याची तक्रार जागरूक नागरिकांनी केली आहे.
किवळे-विकासनगर भागात सार्वजनिक ठिकाणी कचरा टाकण्यात येत असल्याचे चित्र दिसत असून काही सोसायट्यांत राहणारे नागरिक कचरा पेटीत कचरा न टाकता दुचाकीवरुन अगर पायी जाऊन घरातील कचरा रस्त्यालगत टाकत असल्याची माहिती जागरूक नागरिकांकडून मिळाली आहे. त्यांच्यावर कडक कारवाई करण्याची मागणी नागरिक करीत आहेत.
